Дорогие друзья! Наша книга по новозаветной текстологии уже вышла, и ее можно приобрести. Детали здесь
Главная » Библия » Еврейский Танах (на еврейском языке) » הושע (Осия)
| לְכוּ וְנָשׁוּבָה אֶל־יְהוָה, כִּי הוּא טָרָף וְיִרְפָּאֵנוּ; יַךְ וְיַחְבְּשֵׁנוּ׃ | |
| יְחַיֵּנוּ מִיֹּמָיִם; בַּיּוֹם הַשְּׁלִישִׁי, יְקִמֵנוּ וְנִחְיֶה לְפָנָיו׃ | |
| וְנֵדְעָה נִרְדְּפָה, לָדַעַת אֶת־יְהוָה, כְּשַׁחַר נָכוֹן מוֹצָאוֹ; וְיָבוֹא כַגֶּשֶׁם לָנוּ, כְּמַלְקוֹשׁ יוֹרֶה אָרֶץ׃ | |
| מָה אֶעֱשֶׂה־לְּךָ אֶפְרַיִם, מָה אֶעֱשֶׂה־לְּךָ יְהוּדָה; וְחַסְדְּכֶם כַּעֲנַן־בֹּקֶר, וְכַטַּל מַשְׁכִּים הֹלֵךְ׃ | |
| עַל־כֵּן, חָצַבְתִּי בַּנְּבִיאִים, הֲרַגְתִּים בְּאִמְרֵי־פִי; וּמִשְׁפָּטֶיךָ אוֹר יֵצֵא׃ | |
| כִּי חֶסֶד חָפַצְתִּי וְלֹא־זָבַח; וְדַעַת אֱלֹהִים מֵעֹלוֹת׃ | |
| וְהֵמָּה כְּאָדָם עָבְרוּ בְרִית; שָׁם בָּגְדוּ בִי׃ | |
| גִּלְעָד קִרְיַת פֹּעֲלֵי אָוֶן; עֲקֻבָּה מִדָּם׃ | |
| וּכְחַכֵּי אִישׁ גְּדוּדִים, חֶבֶר כֹּהֲנִים, דֶּרֶךְ יְרַצְּחוּ־שֶׁכְמָה; כִּי זִמָּה עָשׂוּ׃ | |
| בְּבֵית יִשְׂרָאֵל, רָאִיתִי שַׁעֲרִירִיָּה (שַׁעֲרוּרִיָּה); שָׁם זְנוּת לְאֶפְרַיִם, נִטְמָא יִשְׂרָאֵל׃ | |
| גַּם־יְהוּדָה שָׁת קָצִיר לָךְ; בְּשׁוּבִי שְׁבוּת עַמִּי׃ פ |