Дорогие друзья! Мы нуждаемся в пожертвованиях на издание нашей книги по Новозаветной Текстологии.
Детали здесь

Войти

עזרא (Ездра): Глава 1

Предыдущая глава Следующая глава Содержание

Глава: 1 2 3 4 5 6 7 8 9 10

1.	וּבִשְׁנַת אַחַת, לְכוֹרֶשׁ מֶלֶךְ פָּרַס, לִכְלוֹת דְּבַר־יְהוָה מִפִּי יִרְמְיָה; הֵעִיר יְהוָה, אֶת־רוּחַ כֹּרֶשׁ מֶלֶךְ־פָּרַס, וַיַּעֲבֶר־קוֹל בְּכָל־מַלְכוּתוֹ, וְגַם־בְּמִכְתָּב לֵאמֹר׃
2.	כֹּה אָמַר, כֹּרֶשׁ מֶלֶךְ פָּרַס, כֹּל מַמְלְכוֹת הָאָרֶץ, נָתַן לִי, יְהוָה אֱלֹהֵי הַשָּׁמָיִם; וְהוּא־פָקַד עָלַי לִבְנוֹת־לוֹ בַיִת, בִּירוּשָׁלִַם אֲשֶׁר בִּיהוּדָה׃
3.	מִי־בָכֶם מִכָּל־עַמּוֹ, יְהִי אֱלֹהָיו עִמּוֹ, וְיַעַל לִירוּשָׁלִַם אֲשֶׁר בִּיהוּדָה; וְיִבֶן, אֶת־בֵּית יְהוָה אֱלֹהֵי יִשְׂרָאֵל, הוּא הָאֱלֹהִים אֲשֶׁר בִּירוּשָׁלִָם׃
4.	וְכָל־הַנִּשְׁאָר, מִכָּל־הַמְּקֹמוֹת אֲשֶׁר הוּא גָר־שָׁם, יְנַשְּׂאוּהוּ אַנְשֵׁי מְקֹמוֹ, בְּכֶסֶף וּבְזָהָב וּבִרְכוּשׁ וּבִבְהֵמָה; עִם־הַנְּדָבָה, לְבֵית הָאֱלֹהִים אֲשֶׁר בִּירוּשָׁלִָם׃
5.	וַיָּקוּמוּ רָאשֵׁי הָאָבוֹת, לִיהוּדָה וּבִנְיָמִן, וְהַכֹּהֲנִים וְהַלְוִיִּם; לְכֹל הֵעִיר הָאֱלֹהִים אֶת־רוּחוֹ, לַעֲלוֹת לִבְנוֹת, אֶת־בֵּית יְהוָה אֲשֶׁר בִּירוּשָׁלִָם׃
6.	וְכָל־סְבִיבֹתֵיהֶם חִזְּקוּ בִידֵיהֶם, בִּכְלֵי־כֶסֶף בַּזָּהָב בָּרְכוּשׁ וּבַבְּהֵמָה וּבַמִּגְדָּנוֹת; לְבַד עַל־כָּל־הִתְנַדֵּב׃ ס
7.	וְהַמֶּלֶךְ כּוֹרֶשׁ, הוֹצִיא אֶת־כְּלֵי בֵית־יְהוָה; אֲשֶׁר הוֹצִיא נְבוּכַדְנֶצַּר מִירוּשָׁלִַם, וַיִּתְּנֵם בְּבֵית אֱלֹהָיו׃
8.	וַיּוֹצִיאֵם, כּוֹרֶשׁ מֶלֶךְ פָּרַס, עַל־יַד מִתְרְדָת הַגִּזְבָּר; וַיִּסְפְּרֵם לְשֵׁשְׁבַּצַּר, הַנָּשִׂיא לִיהוּדָה׃
9.	וְאֵלֶּה מִסְפָּרָם; אֲגַרְטְלֵי זָהָב שְׁלֹשִׁים, אֲגַרְטְלֵי־כֶסֶף אָלֶף, מַחֲלָפִים תִּשְׁעָה וְעֶשְׂרִים׃ ס
10.	כְּפוֹרֵי זָהָב שְׁלֹשִׁים, כְּפוֹרֵי כֶסֶף מִשְׁנִים, אַרְבַּע מֵאוֹת וַעֲשָׂרָה; כֵּלִים אֲחֵרִים אָלֶף׃ ס
11.	כָּל־כֵּלִים לַזָּהָב וְלַכֶּסֶף, חֲמֵשֶׁת אֲלָפִים וְאַרְבַּע מֵאוֹת; הַכֹּל הֶעֱלָה שֵׁשְׁבַּצַּר, עִם הֵעָלוֹת הַגּוֹלָה, מִבָּבֶל לִירוּשָׁלִָם׃ פ